Community site na “Lingkod Kabayan” pag-uugnayin ang mga OFs sa Middle East

Makakuha ng wastong impormasyon at makisalamuha sa mga kapwa overseas Filipinos, bisitahin ang Lingkod Kabayan (me.mytfc.com)

Kailan lamang ay madalas na mapabalita ang tungkol sa ilang mga kinakaharap na pagsubok ng mga overseas Filipinos sa Middle East. Isa na ang repatriation, na ayon sa report ng ABS-CBN News, ilang libong mga overseas Filipinos ang bumalik sa bansa matapos maapektuhan ng Saudization at tinanggap ang amnestiya dahil sa mga paso na nilang mga dokyumento.

Ilan lamang ito sa mga kinakaharap na problema ng mga overseas Filipinos sa Middle East at kinakailangan ng makakatulong sa kanilang matugunan ang mga isyung ito. Kaya naman inilunsad ng TFC Middle East ang Lingkod Kabayan (me.mytfc.com), isang free community site kung saan sila maaaring magpunta upang makakuha ng wastong impormasyon, masagot ang ilang katanungan, at makipag-ugnayan sa mga kapwa overseas Filipinos.

“True to our core of serving the Filipinos worldwide, TFC launches the community site Lingkod Kabayan to look after the welfare of the overseas Filipinos in the Middle East. We hope through this community site, more overseas Filipinos will be empowered as they have within their grasp the knowledge and information that they need for their life overseas,” saad ni ABS-CBN Europe, Middle East, and Africa (EMEA) Managing Director Joseph Arnie Garcia.

Kamakailan lamang ay napabalita ang pagpapaigting ng implementasyon ng Saudization, kung saan karagdagang mga trabaho pa ang hindi na puwedeng pasukin ng mga expat para bigyang-daan ang mga Saudi nationals. Napipilitan din ang ilang overseas Filipinos na maghanap ng trabaho sa kasalukuyang bansang tinutuluyan nila dahil sa lagay ng ekonomiya ng mga estadong kabilang sa Gulf Cooperation Council. Upang matulungan ang mga manggagawang Pilipino na makahanap ng mga bagong employers, sa pakikipagtulungan ng Lingkod Kabayan (me.mytfc.com) sa Bayt.com ay inilunsad ang Trabahanap kung saan mayroon iba’t ibang job listings mula sa ibang mga bansa sa Middle East, na siyang makakatulong upang patuloy na masuportahan ng mga overseas Filipinos ang kanilang mga pamilya sa PIlipinas.

Mahalaga rin na alam ng mga overseas Filipinos ang kanilang mga karapatan base sa bansang kanilang kinarororoonan at ang maunawaan ang mga probisyon sa kanilang employment contracts. Kaya naman ang Lingkod Kabayan (me.mytfc.com) ay nakipagtulungan sa Gulf Law upang ang mga mahahalagang impormasyon na ito ay madaling malaman ng mga overseas Filipinos sa pamamagitan ng Information Center feature ng site. Maaari rin silang mag-message sa Kabayan Helpline na tutulungan silang alamin kung anong ahensya ng gobyerno ang dapat lapitan para sa kanilang isyung nais idulog.

Nakipagtulungan din ang Lingkod Kabayan (me.mytfc.com) kay Salve Duplito ng programang “On the Money” ng ANC upang sagutin ang ilang katanungan ng mga overseas Filipinos pagdating sa pagpapalago at pangangalaga ng perang kanilang pinaghihirapan sa pamamagitan ng message portal ng site.

Samantala, upang kahit papaano ay maibsan ang kanilang pangungulila, magsisilbing tulay nila ang Lingkod Kabayan (me.mytfc.com) sa iba pang mga Filipino communities sa Middle East sa pamamagitan ng Suggest Topic feature ng site, kung saan maaari nilang pag-usapan ang kahit ano, mula sa hinahana-hanap nilang pagkaing Pinoy hanggang sa pinakabagong mapapasyalan sa Middle East.

Hindi madali ang mamuhay malayo sa mga mahal sa buhay, kaya naman malaking bagay para sa mga overseas Filipinos na malamang mayroon silang malalapitang kapwa Pilipino sa oras ng pangangailangan—isang bagay na tutugunan ng Lingkod Kabayan (me.mytfc.com).

Bisitahin na ang Lingkod Kabayan (me.mytfc.com) ngayon.